Кыргызстанда сырттан картошка ташып келүүгө алты айга тыюу салуу сунушталууда.
Тиешелүү токтом долбоору коомдук талкууга чыгарылды. Чара ички рыноктогу
бааны турукташтырып, жергиликтүү дыйкандарга түшүмүн сатууга шарт түзүү максатын көздөйт.
Январь-июль айларында өлкөгө 24,7 миң тонна картошка импорттолгон, анын 21,4 миң тоннасы Кытайдан келген. Ал эми быйыл Кыргызстанда 1 миллион 250 миң тоннага жакын картошка жыйналары күтүлүүдө. Бул ички керектөөдөн 450 миң тоннага көп. Тыюу транзиттик жүккө жана атайын максаттар үчүн алып келинген картошкага тиешелүү болбойт.
