Кыргызстанда 77 миңден ашык аз камсыз үй-бүлө электр энергиясына жеңилдетилген тарифти пайдаланат. Бул тууралуу Эмгек, социалдык камсыздоо жана миграция министрлиги билдирди.
Ведомство айрым аз камсыздалгандар ижарага алынган батирлерде, эс алуу конуштарында же өндүрүштүк жайларда жашагандыктан электр энергиясына жеңилдетилген тарифтен пайдаланбай жатканын белгиледи. Социалдык жардамдын даректүүлүгүн кеңейтүү үчүн Эмгек министрлиги үй-бүлөлөргө түшүндүрүү иштерин жүргүзүүдө.
Эске салсак, аз камсыз болгондор үчүн жеңилдетилген тариф бир киловатт саатына 55 тыйынды түзөт.
