Жакында эле Кыргыз Республикасынын Эл артисти наамын алган Бек Борбиев парламенттик шайлоого катышуу ниетин билдирди. Бул туурасында ал жергиликтүү каналдардын бирине берген маеги учурунда айткан.
Анда ырчы чыгармачылыктан башка жаатта иштөөгө убакыт келгенин белгилеген. Эл артисти наамын алгандан кийин чоң саясатка аралашып көрсөм деген ою болуп келгенин, күтүүсүздөн наам алып калгандан кийин шайлоого катышайын деп жатканын кошумчалаган.
«Мен азыр толук кандуу бир чечимге келе элекмин. Алгач элге кызмат кылган партиянын курамына киришим керек. 2010-жылы мен «Бүтүн Кыргызстан» партиясынын тизмесинде шайлоого аттангам. Азыр акыйкат кызмат кылган партиялар болсо курамына кирип, мандат үчүн күрөшкөнгө даярмын», — деген ал.
Артист азырынча партиянын аталышын ачык айткан жок. Жогорку Кеңешке барса ал маданият тармагындагы маселелерге көңүл бурат.
