Орозо айтка байланыштуу Бишкектеги эски аянттын тегереги оңдолууда. Эки жылдан бери бул жерде жапырт намаз окууга уруксат берилбей келген.
Мэриянын басма сөз катчысы Назгүл Жамгырчиева 2-майда Бишкектин борбордук бөлүгүндө айт намазы окуларын, ушуга байланыштуу асфальты жаңыланып, айланасы иреттелип жатканын «Фейсбукка» жазды.
Мурдагы өкмөт үйүнүн, азыркы Президенттик админстрациянын алдындагы эски аянтта 2020-жылга чейин Орозо айт жана Курман айт намаздары миңдеген кишинин катышуусунда окулуп келген. Коронавирус пандемиясынан улам 2020-жылы жапырт намаз окууга тыюу салынган.
Мусулмандардын бир айлык ыйык орозо айы апрелдин соңунда аяктап, Айт майрамы болжол менен 1-2-майга туш келери кабарланган.
