Сокулук районундагы эки мектепте коронавирус табылгандыктан окуучулар кайра онлайн окууга өтүштү. Бул тууралуу Билим берүү жана илим министрлигинен билдиришти.
Сокулуктагы №3 мектеп-лицейинин химия мугалими коронавирус жуктуруп алып ооруканага түшкөн. Балдар 3-18-апрель аралыгында онлайн окушат.
Ушул эле райондогу Жаңы-Жер айылындагы орто мектеп дагы 5-апрелден 19-апрелге чейин аралыктан окуу режимине өттү. Себеби окуучу кыздын энеси COVID жуктуруп ооруканада жатканы белгилүү болгон.
Чечимди райондун ыкчам штабы санэпидстанциянын көрсөтмөсү менен чыгарган.
