Россиялык “Урал аба жолдору” авиакомпаниясы Кыргызстандын ири шаарларына беш жаңы авиакаттам ачууда.
Бул тууралуу аталган авиакомпаниянын Telegram каналында жазылган. 2022-жылдын жай айларында “Урал аба жолдору” Кыргызстандын ири шаарларына жаңы каттамдарын көбөйтүп, Бишкек жана Ош шаарларынан сырткары Ысык-Көлгө учактарын жөнөтүп турат.
Маалыматка ылайык, Владикавказ – Ош – Владикавказ рейси ар жума күндөрү, Красноярск – Бишкек – Красноярск ар шаршемби, Самара – Бишкек – Самара бейшемби, Сочи – Бишкек – Сочи ишемби күндөрү, Иркутск – Бишкек – Иркутск ар дүйшөмбүдө жана кайра артка жекшемби күндөрү.
Мындан сырткары аталган авиакомпания Бишкек, Ош жана Тамчы аэропортторуна Россиянын 13 шаарынан каттап турат.
8-марттан баштап Россиянын “Аэрофлот” авиакомпаниясы эл аралык каттамдарынын баарын убактылуу токтоткон. 14-марттан тарта Кыргызстанга каттамдарын жанданткан.
Россия 24-февралда Украинада согуш баштагандан кийин бир катар өлкөлөрдүн, эл аралык уюмдардын санкцияларына жана чектөөлөрүнө кабылды.
