Бишкекте Токтоболот Абдумомунов атындагы Кыргыз улуттук академиялык драма театрында “Айтматов жана театр” VI эл аралык театр фестивалы башталды. Бул тууралуу Маданият, маалымат, спорт жана жаштар саясаты министрлигинин басма сөз кызматы билдирди.
Фестиваль залкар жазуучу Чыңгыз Айтматовдун 95 жылдыгына арналган.
Иш-чарада Кыргызстан, Өзбекстан, Казакстан, Түркмөнстан, Россия, Азербайжандан келген театрлар көрөрмандардын назарына Чыңгыз Айтматовдун чыгармаларынан негизинде коюлган спектаклдерди сунуштайт. Фестивалдагы бардык спектаклдер 6 күн бою акысыз көрсөтүлүп, 12-декабрда салтанаттуу жыйынтыкталат.
