Бул тууралуу 18-сентябрда «Галатасарай» футбол клубу расмий билдирүү таратты. Анда кыргызстандык футболчу Бекназ Алмазбеков клуб менен үч жылдык келишимге кол койгону айтылат.
18 жаштагы Алмазбеков ушул жылдын февраль айынан баштап «Галатасарай» клубунун негизги курамында машыга баштаган. 2019-жылдан бери клубдун жаштар командасына ойноп жүргөн.
Буга чейин түрк медиасынын мактоосуна арзып, социалдык тармакта клубдун жетекчиси Фатих Теримдин «ханзаадасы» деп атыккан.
2020-жылы Алмазбеков Акыйкат оюн боюнча эл аралык комитетинин (International Fair Play Committee) футбол беттешинде таза оюн көрсөткөнү үчүн World Fair Play Awards сыйлыгына татыган.
Спортчунун футболдогу жетишкендиги үчүн Түркиянын университеттери да сыйлыктарды тапшырган.
1905-жылы негизделген «Галатасарай» клубу Түркиянын Суперлигасында ойнойт. Учурда чемпионаттын турнирдик жадыбалында 20 клубдун арaсынан 13-катарда бара жатат. 22 жолу Түркиянын чемпиону болуп, 18 жолу өлкө кубогун, 16 жолу Суперкубокту уткан. УЕФА Кубогунун жана Суперкубогунун ээси.
