Маалыматка ылайык, маданият министри Нуржигит Кадырбеков манасчылар менен жыйын өткөргөн. Анда «Манас» эпосуна тиешелүү бир катар көйгөйлөр айтылып, аны чечүү жолдору да талкууланган.
«Манас» эпосун сактоо жана жайылтуу, өлкөдө манас таанууну өнүктүрүү, манасчыларга өкмөт тарабынан колдоо жана камкордукка алуу максатында «Манас» күнүн утурлай мамлекеттик органдарда «Манас таануу» лекциялары окулуп, эпостун чечмелениши жана учурдагы кырдаалга ылайык, «Манас» эпосунун орду тууралуу түшүндүрүү иш-чарасын өткөрүү пландалып жатат«, — деп жазылат маалыматта.
Белгилүү болгондой, 4-декабрь күнү Кыргыз өлкөсүндө «Манас эпосунун күнү» майрамдалат. Бул күн Кыргыз Республикасынын 2015-жылдын 27-апрелиндеги №259 токтомдун негизинде Маданият, маалымат жана туризм министрлигинин, ошондой эле өлкө парламенттин демилгеси аркылуу кабыл алынган.
