Коңшу Кытай жана Казакстанда 28-ноябрга караган түнү жер титиреп, анын силкиниши Ош жана Талас облустарынын аймагында да сезилди.
Сейсмология институтунун маалыматына караганда, түнкү саат 2де Кытайдын аймагында очогунда күчү 5,5 баллга жеткен жер титирөө катталып, Ош облусунун Алай районунун Эркеч-Там, Нура айылдарында 4,5 балл, Терек, Кан-Коргон айылдарында 4 балл, Көлдүк айылында 3 баллга чейин сезилди.
Саат 2 жарымда Казакстандын аймагында очогунда күчү 4 баллга жеткен жер титирөө болуп, анын күчү 3,5 баллга чейин Талас облусунун Кара-Буура районунун Кайнар жана Көк-Сай айылдарында сезилди.
Баштапкы маалымат боюнча, жер титирөөдөн жабыркагандар жана кыйроолор катталган жок.
