Кыргызстанга биринчи жолу Монголиянын элчиси дайындалганын Тышкы иштер, тышкы соода жана инвестициялар министрлигинин маалымат кызматы билдирди.
Министр Руслан Казакбаев жаңы дайындалган элчи Ганхуяг Содномдон ишеним грамотанын көчүрмөсүн кабыл алды.
Казакбаев Башкы консулдукту элчиликке айландыруу чечими үчүн моңгол тарапка ыраазычылык билдирди. Ал ошондой эле жакын арада Монголияда Кыргызстандын элчилиги ачыларын кошумчалады.
Тараптар кыргыз-моңгол мамилелеринин учурдагы абалын, эки тараптуу кызматташуунун келечегин жана соода-экономикалык кызматташтыкты өнүктүрүүгө басым жасоо, борборлор ортосунда түз авиакаттамдарды ачуу боюнча пикир алмашышкан. Мындан сырткары, бир катар маданий иш-чараларды өткөрүү, жогорку иш сапарларды уюштуруу макулдашылды.
Содном министрге ыраазычылык билдирип, эки өлкө ортосундагы соода, экономика, айыл чарба, туризм, маданият жана илим тармактарын жандантуу үчүн бардык күч-аракетин жумшай тургандыгына ишендирген.
